தனது முதல் தேர்தல் வாக்குறுதியை இன்று வெளியிட்டார் – எடப்பாடி பழனிசாமி!

தி.மு.க.வால் தமிழ்நாட்டின் அமைதி, வளம், வளர்ச்சி, மற்றும் மாநில உரிமைகள் அனைத்தும் பறிபோனதாகவும், அவற்றை தான் மீட்டுத் தருவேன் என்றும் அ.தி.மு.க. பொதுச்செயலாளர் எடப்பாடி பழனிசாமி தெரிவித்துள்ளார். இதுவே, 2026 சட்டமன்றத் தேர்தலுக்கான தனது முதல் வாக்குறுதி என்றும் அவர் குறிப்பிட்டுள்ளார். இதுகுறித்து அவர் தனது எக்ஸ் தளத்தில் விரிவாகப் பதிவிட்டுள்ளார்.

“நான்காண்டுகள் ஆட்சியில் மக்களுக்கு ஒன்றுமே செய்யாத முதலமைச்சர் மு.க.ஸ்டாலின், அரசு விழா என்ற பெயரில் அரசியல் பேசுகிறார். அ.தி.மு.க.வைப் பற்றியே புலம்பிக் கொண்டிருக்கிறார்,” என்று எடப்பாடி பழனிசாமி கடுமையாக விமர்சித்துள்ளார்.

அவர் மேலும், “ஒருநாள், ஒரு நொடி கூட, எங்கள் பெயரிலும், கொடியிலும் மட்டுமல்ல, எங்கள் குருதியிலும் குடியிருக்கும் பேரறிஞர் அண்ணாவை விட்டுக்கொடுக்க மாட்டோம்,” என்றார்.

முதலமைச்சர் ஸ்டாலின் திருப்பத்தூரில் பேசும்போது, “அண்ணா பெயரை அ.தி.மு.க. அடமானம் வைத்துவிட்டது” என்று கூறியதற்குப் பதிலளித்த எடப்பாடி பழனிசாமி, “முதலமைச்சரும், தி.மு.க.வும் அண்ணா பெயரை உச்சரிக்கலாமா?” என்று கேள்வி எழுப்பினார்.

அண்ணா மீது கண்ணீர் வடித்த கையோடு அவரது கொள்கைகளை குழி தோண்டிப் புதைத்து, அண்ணாவின் கட்சியையும், ஆட்சியையும் கபளீகரம் செய்து, தி.மு.க.வை குடும்பக் கொள்ளையின் கூடாரமாக கருணாநிதி மாற்றியதன் விளைவாக, அண்ணாவின் கொள்கை விழுமியங்களை நெஞ்சில் ஏந்தி எம்.ஜி.ஆரால் அ.தி.மு.க. தொடங்கப்பட்டது என்றும் அவர் குறிப்பிட்டார்.

அண்ணாவின் கொள்கைகளுக்கு மாறாக, குடும்ப ஆட்சி நடத்திக் கொண்டிருக்கும் முதலமைச்சர் மு.க.ஸ்டாலின் தங்களுக்கு பெரியார், அண்ணா பற்றி பாடம் எடுக்க வேண்டிய அவசியம் இல்லை என்றும், “யாரை ஏமாற்றிக் கொண்டிருக்கிறார் மு.க.ஸ்டாலின்?” என்றும் எடப்பாடி பழனிசாமி கேள்வி எழுப்பினார்.

“கச்சத்தீவு முதல் காவிரி வரை தமிழ்நாட்டை, அதன் உரிமைகளை அடகு வைத்ததும், வைக்கத் துணிவதும் தி.மு.க. தான்,” என்று குற்றம்சாட்டிய அவர், “தன்மானமிக்க தமிழ்நாட்டு மக்கள், பகல்வேஷக் கட்சியான தி.மு.க.வை 2026ல் நிச்சயம் விரட்டியடிப்பார்கள்,” என்று நம்பிக்கை தெரிவித்தார்.

இறுதியாக, “தி.மு.க.வால் பறிபோன தமிழ்நாட்டின் அமைதி, வளம், வளர்ச்சி, மாநில உரிமை என அனைத்தையும் நான் மீட்டுத் தருவேன். இதுவே, தமிழ்நாட்டு மக்களுக்கு நான் அளிக்கும் 2026 தேர்தலுக்கான முதல் வாக்குறுதி,” என்று எடப்பாடி பழனிசாமி தனது தேர்தல் அறிக்கையை அறிவித்தார்.