உதகையில் மலர் கண்காட்சியை தொடங்கி வைத்தார் மு.க.ஸ்டாலின்

உதகையில் மலர் கண்காட்சியை தொடங்கி வைத்தார் மு.க.ஸ்டாலின்

 

தமிழ்நாடு முதலமைச்சர் மு.க.ஸ்டாலின் உதகை தாவரவியல் பூங்காவின் 127-வது மலர் கண்காட்சியை இன்று தொடங்கி வைத்தார்.

கோடை விடுமுறையைக் கொண்டாட ஊட்டிக்கு வருகை தரும் சுற்றுலாப் பயணிகளை கவரும் வகையில் இந்த ஆண்டுதோறும் நடத்தப்படும் கோடை விழாவின் முக்கிய அங்கமாக இந்த மலர் கண்காட்சி திகழ்கிறது.

மலர் கண்காட்சி இன்று முதல் (மே 15- 25ம்) தேதி வரை, மொத்தம் 11 நாட்களுக்கு நடைபெற உள்ளது.

மலர் கண்காட்சியில் பல்வேறு நாடுகளிலிருந்து பெறப்பட்ட 275 வகையான விதைகள் மற்றும் நாற்றுகளில் இருந்து உற்பத்தி செய்யப்பட்ட மலர் செடிகள் காட்சிக்கு வைக்கப்பட்டுள்ளன.

இதில் ஜெர்மனியம், சைக்ளோபின், பால்சம், புதிய ரக ஆர்னமெண்டல்கேல், ஓரியண்டல் லில்லி, பேன்சி மேரிகோல்டு, ஜினியா, டெல்முனியம் போன்ற பல புதிய ரகங்கள் கண்காட்சியில் வைக்கப்பட்டுள்ளனர்.

பூங்காவின் பல்வேறு பகுதிகளில் சுமார் 7½ லட்சம் மலர் நாற்றுகள் நடவு செய்யப்பட்டுள்ளன.

45 ஆயிரம் மலர் தொட்டிகளில் விதவிதமான மலர்கள் அலங்கரிக்கப்பட்டுள்ளன.

இந்த ஆண்டு கண்காட்சியின் முக்கிய சிறப்பம்சமாக, சோழர்களின் பாரம்பரியத்தை நினைவுபடுத்தும் வகையில் பிரம்மாண்டமான மலர் அலங்காரங்கள் செய்யப்பட்டுள்ளன.

பல்வேறு வகையான மலர்களைக் கொண்டு ராஜராஜ சோழனின் அரண்மனை போன்ற ஒரு அமைப்பு உருவாக்கப்பட்டுள்ளது.

சோழ அரசின் பெருமையை பறைசாற்றும் விதமாக, கரிகாலன் கட்டிய கல்லணையின் வடிவம் 65 ஆயிரம் பூக்களைக் கொண்டு வடிவமைக்கப்பட்டுள்ளது.

7 லட்சம் மலர்களைப் பயன்படுத்தி செஸ் போர்டு, யானை போன்ற கவர்ச்சியான அலங்காரங்களும் செய்யப்பட்டுள்ளன.

தாவரவியல் பூங்காவில் உள்ள கண்ணாடி மாளிகை மற்றும் கள்ளிச்செடி மாளிகை ஆகியவை புதுப்பிக்கப்பட்டுள்ளன.

இந்த புதுப்பிக்கப்பட்ட பகுதிகளில் அரிய வகை தாவரங்கள் மற்றும் மலர் செடிகள் காட்சிக்கு வைக்கப்பட்டுள்ளன.

பாரம்பரியத்தை மலர்களின் மூலம் அழகாக வடிவமைத்து மக்கள் மத்தியில் உணர்வூட்டும் இந்த நிகழ்வு, தமிழ்நாட்டின் பெருமையை உலகுக்கு காட்டும் சிறந்த வாய்ப்பாக அமைந்துள்ளது.