காசா போர்நிறுத்த பேச்சுவார்த்தை தோல்வி!

இஸ்ரேலுக்கும் ஹமாஸுக்கும் இடையேயான காசா போர்நிறுத்தப் பேச்சுவார்த்தைகள் மீண்டும் தோல்வியடைந்துள்ளதாக அறிவிக்கப்பட்டுள்ளது. எகிப்து, கத்தார் மற்றும் அமெரிக்காவின் மத்தியஸ்தத்துடன் நடைபெற்று வந்த இந்த முக்கியப் பேச்சுவார்த்தைகள் எவ்வித உடன்பாடும் எட்டப்படாமல் முடிவடைந்துள்ளதால், காசா பகுதியில் பதற்றம் மேலும் அதிகரித்துள்ளதுடன், மனிதாபிமான நெருக்கடி தொடரும் என்ற அச்சம் எழுந்துள்ளது.

கடந்த பல மாதங்களாகத் தொடர்ந்து நடைபெற்று வரும் இஸ்ரேல்-ஹமாஸ் மோதலை முடிவுக்குக் கொண்டு வரவும், காசாவில் நிரந்தர அமைதியை ஏற்படுத்தவும், இஸ்ரேலிய பிணைக்கைதிகளை விடுவிக்கவும், காசாவுக்கு மனிதாபிமான உதவிகள் தடையின்றிச் சென்றடையவும் பல்வேறு கட்டப் பேச்சுவார்த்தைகள் நடத்தப்பட்டு வருகின்றன. எகிப்து, கத்தார் மற்றும் அமெரிக்கா ஆகிய நாடுகள் மத்தியஸ்தர்களாகச் செயல்பட்டு, இரு தரப்பிற்கும் இடையே சமரசம் செய்ய முயற்சித்து வருகின்றன.

ஹமாஸ் ஒரு நிரந்தர போர்நிறுத்தத்திற்கு வலியுறுத்தி வரும் நிலையில், இஸ்ரேல் ஹமாஸின் இராணுவத் திறனை முழுமையாக அழிக்கும் வரை சண்டையை நிறுத்த முடியாது என்பதில் உறுதியாக உள்ளது.

பிணைக்கைதிகளின் எண்ணிக்கை, அவர்களை விடுதலை செய்வதற்கான நிபந்தனைகள், மற்றும் அதற்கு ஈடாக விடுதலை செய்யப்பட வேண்டிய பாலஸ்தீனிய கைதிகளின் பட்டியல் ஆகியவற்றுக்கிடையே இரு தரப்புக்கும் உடன்பாடு எட்டப்படவில்லை.

மோதலின் முழுமையான முடிவை ஹமாஸ் கோரும் நிலையில், இஸ்ரேல் ஹமாஸின் ஆட்சி அதிகாரத்தை அகற்றாமல் மோதலை முடிவுக்குக் கொண்டுவர முடியாது எனக் கருதுகிறது.

காசா போர்நிறுத்தப் பேச்சுவார்த்தையின் தோல்வி, அப்பகுதியில் வாழும் மக்களுக்குத் தொடர்ச்சியான துன்பங்களையும், பாதுகாப்பின்மையையும் அளிக்கிறது. சர்வதேச சமூகம் அழுத்தம் கொடுத்து, இரு தரப்பினரையும் மீண்டும் பேச்சுவார்த்தை மேசைக்குக் கொண்டு வரவும், மனிதாபிமான நெருக்கடியைத் தணிக்கவும், நீண்டகால அமைதிக்கான ஒரு தீர்வை எட்டவும் உடனடி நடவடிக்கை எடுக்க வேண்டியது அவசியமாகும்.

காசா பகுதிக்கு விமான சாகசங்கள் தேவையில்லை, முற்றுகையிடப்பட்ட, பட்டினியால் வாடும் பொதுமக்களின் உயிர்களைக் காப்பாற்ற திறந்த மனிதாபிமான வழித்தடமும், தினசரி நிலையான உதவி லாரிகளும் தேவை, என்று ஹமாஸ் நடத்தும் காசா அரசாங்க ஊடக அலுவலகத்தின் இயக்குனர் இஸ்மாயில் அல்-தவாப்தா ராய்ட்டர்ஸிடம் தெரிவித்தார்.

ராஜஸ்தான் பள்ளி விபத்து: 6 மாணவர்கள் பலி, பிரதமர் மோடி இரங்கல்!

ராஜஸ்தான் மாநிலம் ஜலாவர் மாவட்டத்தில் உள்ள பிப்லோடி தொடக்கப் பள்ளியில் இன்று காலை பள்ளியின் மேற்கூரை முழுவதுமாக இடிந்து விழுந்து விபத்திற்குள்ளானது. இந்த விபத்தில் இடிபாடுகளில் சிக்கிய மாணவர்களின் அலறல் சத்தம் கேட்டு, பள்ளிக்கு வந்த அப்பகுதி கிராம மக்கள் கான்கிரீட் கற்களை அகற்றி மாணவர்களை மீட்கும் பணியில் ஈடுபட்டனர். இந்த விபத்தில் 4 மாணவர்கள் சம்பவ இடத்திலேயே உயிரிழந்தனர். மேலும் 17 மாணவர்கள் படுகாயம் அடைந்தனர்.

இதையடுத்து படுகாயம் அடைந்த மாணவர்கள் உடனடியாக அருகில் உள்ள மருத்துவமனைக்கு சிகிச்சைக்காக அனுப்பி வைக்கப்பட்டனர். அங்கு அவர்களுக்கு தீவிர சிகிச்சை அளிக்கப்பட்டது. இதனிடையே பள்ளி மேற்கூரை இடிந்து விழுந்த அறையில் சுமார் 60-க்கும் மேற்பட்ட மாணவ-மாணவிகள் அமர்ந்திருந்ததாக கூறப்படுகிறது.

எனவே காயம் அடைந்தவர்களின் எண்ணிக்கை மேலும் அதிகரிக்கலாம் என்று கூறப்பட்டது. இது குறித்து தகவல் அறிந்து சம்பவ இடத்திற்கு வந்த போலீசார், தீயணைப்பு வீரர்கள், மீட்பு படையினர் ஆகியோரும் மீட்பு பணியில் ஈடுபட்டனர். மேலும் மீட்பு பணியில் 4 ஜே.சி.பி. எந்திரங்கள் ஈடுபடுத்தப்பட்டுள்ளன. இந்நிலையில் பள்ளி மேற்கூரை இடிந்து விழுந்த விபத்தில் உயிரிழந்த மாணவர்களின் எண்ணிக்கை 6 ஆக உயர்ந்துள்ளது.

உயிரிழந்த மாணவர்களின் குடும்பத்திற்கு பிரதமர் மோடி ஆறுதல் தெரிவித்துள்ளார். இதுதொடர்பாக பிரதமர் மோடி வெளியிட்டுள்ள எக்ஸ் தள பதிவில் “ராஜஸ்தானில் அரசு பள்ளி கட்டிடம் இடிந்து விழுந்து மாணவர்கள் உயிரிழந்த செய்தி மிகுந்த வருத்தமளிக்கிறது. பள்ளி கட்டிடம் விழுந்த விபத்தில் காயமடைந்தவர்கள் விரைவில் குணமடைய பிரார்த்திக்கிறேன். பாதிக்கப்பட்டவர்களுக்கு அதிகாரிகள் அனைத்து உதவிகளையும் வழங்கி வருகின்றனர்”. இவ்வாறு அதில் தெரிவிக்கப்பட்டுள்ளது.

ஜூலை 26-ல் தூத்துக்குடி வருகிறார் பிரதமர் மோடி!

ஜூலை 26, 27 ஆகிய இரு நாள்கள் அரசு முறைப் பயணமாக தமிழகம் வருகிறாா். 1,030 கோடி ரூபாய் மதிப்பீட்டிலான ரயில் திட்டங்களை நாட்டுக்கு அர்ப்பணிக்க உள்ளார்

1. மதுரை – போடிநாயக்கனூர் பாதையின் மின்மயமாக்கல் திட்டம் (₹99 கோடி)மதுரை மற்றும் போடிநாயக்கனூர் இடையே உள்ள 90 கிலோ மீட்டர் ரயில் பாதையை மின்மயமாக்குகிறது.

2. நாகர்கோவில் டவுன் – கன்னியாகுமரி பிரிவு இரட்டை வழிப் பாதை (₹650 கோடி) ₹650 கோடி செலவில், 21 கிலோ மீட்டர் நீளமுள்ள நாகர்கோவில் டவுன் – கன்னியாகுமரி பிரிவு இரட்டை வழிப் பாதையாக மாற்றப்பட்டுள்ளது.

3. ஆரல்வாய்மொழி – நாகர்கோவில் சந்திப்பு இரட்டிப்பு மற்றும் திருநெல்வேலி – மேலப்பாளையம் இரட்டிப்பு (₹283 கோடி)இந்த இரட்டிப்புப் பணிகளுக்காக ₹283 கோடி செலவிடப்பட்டுள்ளது. இதில் ஆரல்வாய்மொழிக்கும் நாகர்கோவில் சந்திப்பிற்கும் இடையிலான 12.87 கி.மீ தூரமும், திருநெல்வேலிக்கும் மேலப்பாளையத்திற்கும் இடையிலான 3.6 கி.மீ தூரமும் அடங்கும்.

பிரதமர் மோடி தொடங்கி வைக்கவுள்ள இந்த ₹1,028 கோடி மதிப்பிலான ரயில்வே திட்டங்கள், தென் தமிழகத்தின்பிரதமர் போக்குவரத்து உள்கட்டமைப்பில் ஒரு பெரிய பாய்ச்சலைக் குறிக்கின்றன. இவை பயணிகள் மற்றும் சரக்கு போக்குவரத்தை மேம்படுத்தும்.